Transkription [Th. Eser]: »Dem erwern Enders Imhof zu Venedig, meinem lieben sun. Mein freuntlichen grus und ales gut, lieber Enders. Mir ist dein pryef worden und gern gehabt. Hab aber lieber, du selber kümen werst, das ye nun wol zeit werst. Got geb, du kein solche reiß mer habst. Den man pilich nun dolest ein weil, dem schont als ich guter hofnung pin gesechen. Sol lieber Enders, ich hab dir umb etlich ding geschriben, hab ich etles vergesen, das ich auch gern haben wolt. Kanst du es anders an kümen ein margen pild, wie mons dinen in kamern hat. Ich hab ir hye vil in des Schenck kram gesechen. Wol ich eins kauft haben, heten sy kein Leuchter dar vor. Wolt ich gern eins haben mit einem leuchter. Ich hab ein recht stat in meiner kamer darzu. Doch das es uber zwen gulden ungefer nit kost. Ich weiß nit, ob sy teuer sin oder nit. Und vergyß mir der zymet [=Zimt] nit, das du sy mit dir fürst. Het dir mer zu schreiben gehabt, so hab ich gleich vergebens gesriben, das ich meint, unterwegen soIst sein. Die Furerin ist heut darn[ieder?] gelegen, hat einen sun gehabt. Pin aber einer sorg abekumen damit. Pis got bevolchen. K[atharina] Hensin Imhof«